Мана, тонг ҳам отиб қувонч ва ташвишли яна бир кунга кириб келдик.Кичик ўлим ҳисобланмиш уйқудан тургим келмай зўрға уйғондим. Тўғриси ўзим турганим йўқ, балки борлиқнинг Эгаси тарафидан тирилдим, ҳа, қайта тирилдим. Кўзимни очар эканман хаёлимни ҳар сафар бир туйғу чулғайди.
Эй Аллоҳим, Ўзингга ҳамд бўлсин! Сен қимматли фурсат кунларидан яна бир кунни менга ато қилдинг.
Эй Аллоҳим, Ўзингга ҳамд бўлсин! Сен менга раво кўрган кунларингдан яна бирини кўришни насиб қилдинг.
Эй Аллоҳим, Ўзингга ҳамд бўлсин! Кўзимни қоронғу қабрда эмас, балки ўз тўшагимда очдинг.
Эй Аллоҳим, Ўзингга ҳамд бўлсин! Сен мени ўз аъзоларимга бўлган султонлигимни қайтариб, уларни хизматимга шай қилиб бердинг.
Эй Аллоҳим, Ўзингга ҳамд бўлсин! Мени мусулмон қилиб, иймон билан тирилтирганингга лойиқ шукр қилувчи бандаларингдан қил!...
Хуллас, бу неъматларни қисман бўлса ҳам ҳис қилиб, бу кун мен нима қилишим кераклигини ўйлай бошлайман. Ўзимча бир нималарни режалаштираман, лекин буларни қайси бирини қилиш насиб бўлишини билмайман.
Эй Аллоҳим, бу кунни Қиёматда фойдамга ҳужжат қил! Берган кунингга яраша фойдаланишни ҳамда иймон ва тақво билан ўтказишни насиб қил! Ўзинг вақтимга барака бериб, Сени рози қиладиган ишларни бажаришга муваффақ қил! Бенуқсон динингни олий бўлишида бизни ҳиссадор қил ва мужримлар учун тайёрлаб қўйган жаҳаннамингни бизга асло кўрсатма!
Жуда кўп одамлар ўзини нима учун яратилганини билмайди ва билишни ҳам хоҳламайдилар. Молини камайганига ачинадилару, умрини камайганига парво қилмайдилар. Нима учун?... Нима учун яна бир кун берилди?... Биз бу кунни қандай ва қачон қадрлаймиз?...
Қаранг, табиат қандай сокин! Қаранг кўз, қўл, тил, оёқ... лар қандай итоатли! Қаранг юракнинг ишлашию нафаснинг кириб чиқишига! Ажойиб мўъжизалар эмасми?! Қаранг...!!!
Абдуллоҳ ибн Масуъд розияллоҳу анҳу: «Қуёш ботиб, куним ўтиб ва менга берилган муҳлат қисқариб, унда амалим зиёда бўлмаганига ачинганим каби бирор нарсага ачинмадим», деган эканлар. Бизчи?... Биз ҳам ачинамизми? Ёки бу ҳақда ўйлашга вақт ҳам йўқми? Балки ҳали кунлар кўп... деб ўйлармиз!
Фурсатни бой бермаган кишидан ҳам бахтли одам борми?! Фурсатни бой бергандан ҳам бахтиқаро борми?